१८ असार । झापा र मोरङका दर्जन बढी गाउहरु बाढीको उच्च जोखिममा रहेका छन् । झापाको कन्काई, रतुवा, बिरिङ, मावा, कमल तथा मोरङ्गका बक्राहा, लोहन्द्रा, चिसाङ, सिंगिया,लगायत खोला आसपास क्षेत्रका दर्जनौ गाउ बस्ती बाढिको उच्च जोखिममा रहेका हुन । केही दिनयताको वर्षाका कारण दर्जनभन्दा बढी गाउ बाढिको पानी पसेर जलमग्न बनेका छन् । रेडक्रस सोसाइटीको अध्ययन अनुसार सम्भावित उच्च जोखिमका क्षेत्रहरुमा तत्काल सचेतनामूलक कार्यक्रम गर्नुका साथै सतर्कता र उद्धारको पूर्व तयारी आवश्यक देखिएको छ ।
बक्राहा खोलामा आएको बाढीका कारण आसपासका मधुमल्ला, गोविन्दपुर, इटहरा, बरडंगा, हसन्दह लगायत गाउबस्ती जलमग्न हुन थालेका छन् । यसैगरी रतुवा खोलाका कारण सिजुवा, महादेवालगायत गाउँ प्रभावित बनेका छन् । गत वर्षको बाढीमा ती गाउका हजारौं बासिन्दा डुबानमा परेका थिए । झापा र मोरङमा दर्जनभन्दा बढीको डुबेर मृत्यु भएको थियो । सप्तकोशी नदिमा पानीको बहाव बढेसंगै सुनसरीको पश्चिमी क्षेत्रका गाँउ वस्तिहरु जोखिमा परेका छन ।
पहाडी भेगमा अधिक बर्षा भएपछि सप्तकोशीले चतरा क्षेत्रमा निर्माण गरिएका स्परहरुमा कटान शुरुगरेको जिल्ला प्रहरी कार्यालय सुनसरीले जनाएको छ । पानीले खतराको संकेत नाघेपछि स्थानीयलाई सचेत रहन स्थानीय प्रशासनले आग्रह गरेको छ । यसैविच कर्णाली बबई र पश्चिम राप्तीमा बाढीको जोखिम बढेको छ । बाढीसँगै त्यस क्षेत्रमा पहिरोको समेत खतरा बढेको जल तथा मौसम विज्ञान विभागले जनाएको छ ।
कर्णाली नदीमा पानीको बहाव बढ्दै गएको छ । खतराको संकेत थपिँदै गएको र त्यही अनुसार सूचना प्रवाह गरिरहेको विभागले जानकारी दिएको छ । कर्णालीमा बाढी आएपछि चिसापानी आसपासका नागरिकलाई सचेत रहन विभागले आग्रह गरेको छ ।
बबई नदीमा बाढी आए बर्दिया, सुर्खेत, जाजरकोटका केही भाग डुबानमा पर्ने सम्भावना हुन्छ । यस्तै पश्चिम राप्तीको बाढीले बाँके, दाङमा जोखिम बढेछ । यसअघि पनि यी दुई नदीमा आएको बाढीले क्षति पुर्याउने गरेको थियो ।
