भद्रपुर १५ कार्तिक । भद्रपुर नगरपालिका १० का ३७ बर्षीय दुर्गाबहादुर कटुवालको हात्तीको आक्रमणबाट हिजो साँझ मृत्यु भएको छ ।
हात्ती लखेट्ने क्रममा कटुवालको मृत्यु भएको हो । हात्तीले उनलाई सुडले पछारेको थियो । घाइते भएपछि उपचारका लागि मेची अञ्चल अस्पताल भद्रपुर लैजाँदै गर्दा बाटैमा उनको मृत्यु भएको जिल्ला प्रहरी कार्यालय झापाले जनाएको छ ।
चारआली जंगलबाट निस्केका चारवटा हात्ती गाउँ पसेपछि स्थानीयले लखेट्ने प्रयास गरेका थिए । सोही क्रममा कुटवाललाई हात्तीले जंगल छेऊमा आक्रमण गरेको चन्द्रगढी सामुदायिक वनका अध्यक्ष हीरा पोखरेलले जानकारी दिनुभयो ।
हात्तीले स्थानीय चन्द्रवती चौधरी, धु्रव कार्की, तारा चम्लागाईं, अनिल राजवंशी, नारायण दाहाल, लगायतको २५ विगाहमा लगाइएको धान नष्ट गरेको छ । हात्ती नजिकैको जंगलमा दिनभर वस्ने र बेलुका भएपछि गाउँ पस्ने गर्नाले त्यस क्षेत्रमा चारवटा हात्तीले उपद्रो मच्चाउँदै आएका छन् ।
