ईलाम । नेपाली काजग बनाउन कच्चापदार्थका रुपमा प्रयोग हुदै आएको अर्गेली खेतीबाट इलामका किसानले राम्रो आम्दानी गर्दै आइरहेका छन । अन्नबाली मकै र आलुको खेती छाडेर इलामको लेकाली गाउँका किसानले व्यवसायिक अर्गेली खेती गरेपछि उनीहरुले राम्रो आम्दानी गर्न थालेसंगै आत्मनिर्भर समेत बन्दै गएका हुन् ।
अन्नबाली मकै र आलु बाली लगाउने बारीमा यस क्षेत्रका किसानले अर्गेली खेतीबाट मनग्ये आम्दानी गर्न सफल भएको पाँचथरका जिल्ला वन अधिकृत भरत श्रेष्ठले बताउनुभयो । मकै र आलु खेतीबाट तीन महिना मात्रै खान पुग्ने र बाँकी ९ महिना ज्याला मजदुरी गरी घरपरिवार चलाउने गरेका यस क्षेत्रका स्थानीयहरु पछिल्लो समय अर्गेली खेतीतिर आर्कषित भएका हुन ।
यस क्षेत्रमा उत्पादन भएको अर्गेलीको लोक्ता गाउँमै व्यापारीले प्रतिकिलो ८० रुपैयाँदेखि सय रुपैयाँसम्ममा खरिद गर्न थालेपछि बजार र मुल्यमा समस्या नभएको किसानले बताएका छन् । अर्गेली हाते कागज बनाउन प्रयोग गरिने विशेष प्रकारको बनस्पती हो ।
