१ भाद्र । आजदेखि दूधको मूल्य प्रतिलिटर ६ रुपैयाँ बढोको छ ।

दुग्ध विकास संस्थान र निजी डेरीको दूधको मूल्य प्रतिलिटर ७० रुपैयाँ हुनेछ । दुग्ध विकास बोर्डले दूधको मूल्य ६ रुपैयाँ बढाउन स्वीकृति दिए लगतै आजदेखि नयाँ मूल्य कार्यान्वयनमा आएको हो । एक प्याकेट आधा लिटर दूधको मूल्य अब ३५ रुपैयाँ कायम भएको छ । यसअघि दूधको मूल्य प्रतिलिटर ६४ रुपैयाँ थियो । बोर्डका अनुसार बढेको मूल्यमा किसानले एक लिटरमा ४ रुपैयाँ १४ पैसा पाउनेछन् । दूध बिक्री गर्ने बुथम्यानले एक लिटरमा एक रुपैयाँ थप पाउनेछन् भने दूध प्रशोधन गर्ने उद्योगले लिटरमा ८६ पैसा मात्रै पाउनेछन् ।

सरकारले तीन वर्षपछि दूधको मूल्य बढाउन स्वीकृति दिएको हो । यसअघि २०७१ सालमा दूधको मूल्य प्रतिलिटर आठ रुपैयाँ बढेको थियो । डेरी उद्योग संघ नेपालका अध्यक्ष अरनिको राजभण्डारीले तीन वर्षपछि दूधको मूल्य बढेको बताउँदै बढेको मूल्यमा सबैभन्दा बढी किसानलाई फाइदा पुग्ने बताउनु भयो ।  उहाका अनुसार दूधको मूल्य बढेपछि दूधबाट बन्ने अरु परिकारको मूल्य पनि बढ्नेछ । उहाले एक÷दुई दिनभित्रै दूध बाहेक घिउ, दही, पनिर लगायतका वस्तुको मूल्य समेत बढ्ने जानकारी दिनु भयो ।