एजेन्सी / बंगलादेशको एक उद्योगमा आगलागी हुँदा १५ जनाको मृत्यु भएको छ । टोन्गी शहरमा रहेको एक उद्योगको भट्टी बिस्फोट हुँदा अन्य ७० जना घाइते भएका छन् ।
विस्फोट भएका बेला उद्योगमा झण्डै एक सय जना कार्यरत थिए । बिस्फोट लगतै चार तले उद्योग भवनमा आगलागी भएको हो । बंगलादेशमा कमजोर उद्योग सुरक्षा प्रणालीका कारण आगलागी हुने गरेको छ । गत वर्ष ढाकामा रहेको एक प्लाष्टिक उद्योगमा आगलागी हुँदा १३ जनाको ज्यान गएको थियो ।
सन् २०१३ मा ढाकामा रहेको एक व्यापारिक भवन भत्किँदा ११ सय ३५ जनाको ज्यान गएको थियो । यस्तै सन् २०१२ मा ढाकाको बाहिरी क्षेत्रमा रहेको उद्योगमा आगलागी हुँदा एक सय १२ जनाको ज्यान गएको थियो ।
