एजेन्सी, भदौ ९ । अफगानिस्तानको काबुलस्थित एक अमेरीकी विश्वविद्यालयमा भएको आतंकवादी हमलामा १३ जनाको मृत्यु भएको छ । हतियारसहित विश्वविद्यालयमा प्रवेश गरेका बन्दुकधारीहरुले अन्धाधुन्ध गोली चलाउँदा सात विद्यार्थी, तीन सुरक्षाकर्मी र तीन सुरक्षा गार्डको मृत्यु भएको हो ।
सुरक्षा कारबाहीमा दुई बन्दुकधारीको पनि मृत्यु भएको हो । घटनामा ३५ जना विद्यार्थी र ९ सुरक्षाकर्मी घाइते भएका छन् । १७ सय विद्यार्थी अध्ययन गर्ने सो विश्वविद्यालयमा घटनाका बेला विद्यार्थी र कर्मचारी गरी ७ सय ५० जना थिए ।
बन्दुकधारीहरु विश्वविद्यालयमा प्रवेश गरी आक्रमण गर्न थालेपछि विश्वविद्यालयका विद्यार्थी तथा कर्मचारी कक्षा कोठामा लुकेर ज्यान जोगाएका थिए । बन्दुकधारीहरुले विश्वविद्यालयको कक्षा कोठामा दुई वटा ग्रिनेड प्रहार गरेकाले धेरै विद्यार्थी घाइते भएका हुन् । घटनाको जिम्मेवारी हालसम्म कसैले लिएको छैन ।
