काठमाण्डौं । नेपाल चलचित्र निर्देशक समाजको अध्यक्ष पदमा सुचित्रा श्रेष्ठ निर्वाचित भएकी छिन । नेपालकी पहिलो महिला निर्देशक सुचित्राले घाईते, प्रेम युद्ध, खै को कस्को लगायतका चलचित्रहरु निर्देशन गरेकी छिन ।
चलचित्र विकास वोर्डको हलमा सम्पन्न समाजको ११ औं साधारणसभामा उनी चलचित्र निर्देशक समाजको आगामी ३ बर्षे कार्यकालका लागि विजयी भएकी हुन् ।
शनिवार भएको निर्वाचनमा राजु केसीलाई पछि पार्दै समाजको अध्यक्ष पदमा सुचित्रा विजयी भईन् । सुचित्राको पक्षमा ६९ मत परेको थियो भने केसीको पक्षमा ३४ मत पर्याे ।
यस्तै समाजको उपाध्यक्ष पदमा रक्षासिंह राणा र दिपक खाँड विजयी भएका छन् । रक्षाले सर्वाधिक ८३ मत प्राप्त गरिन् भने दिपकले ४९ ल्याए ।
दुई उपाध्यक्षको लागी तीन जनाको उमेद्वारी परेकोमा प्रमोद भण्डारी ४० मत सहित तीन नम्बरमा परे । यस्तै सचिव पदमा शेखर खनाल विजयी भएका छन् ।
उनले ५० मत ल्याए भने प्रत्यासी जनकद्विप पराजुलीले ४८ मत ल्याउँदै २ मतले पछि परे । कोषाध्यक्ष पदमा विश्वमणी घिमिरे आएका छन् ।
उनले प्रतिद्वन्दी समिर बलामीलाई ४० मतले पछि पारे । घिमिरेको पक्षमा ६९ र वलामीको पक्षमा २९ मत पर्याे । त्यस्तै सहकोषाध्यक्ष पदमा राजु अधिकारी ४७ मतसहित विजयी भएका छन् ।
यस्तै सदस्यहरुमा अरुणकुमार प्रधान, समुन्द्र भट्ट, अजित अधिकारी, शानु शाक्य, रञ्जित राना र आरविके शरद विजयी भए ।
महा सचिवमा भने गोपालचन्द्र लामिछाने यसअघि नै निर्विरोध चयन भईसकेका छन् । १३८ जना निर्देशकले मताधिकार पाएकोमा जम्मा १०३ मत मात्र खसेको थियो ।
