विवेक भट्टराई इटहरी २६ पुस । कृषकको माग नभएपछि तोकिएको मुल्य भन्दा आधा कममा विक्रि गर्ने बताए पनि बंगुरका पाठा विक्रि नभएको क्षेत्रीय कृषि केन्द्र तरहराले जानकारी दिएको छ ।
कुनै समय क्षेत्रीय कृषि केन्द्र तरहराबाट उत्पादीत बंगुर भने पछि कृषकहरुमा खरिदका लागि दौडादौड नै चल्ने गर्दथ्यो । तर अहिले कृषकहरुको माग नभएपछि केन्द्रबाट उत्पादित वंगुर विक्रि हुन सकेको छैन ।
विशेष गरि भारत र भुटानमा निकासी हुँदै आएको यी वंगुरको निकासी हुन छाडेका कारणले समस्या भएको केन्द्रले जानकारी दिएको छ । क्षेत्रीय अनुसन्धान केन्द्रले उत्पादित वंगुरको विक्रिका लागि आह्वान गरेपनि लिन कृषक नआएपछि दोस्रो पटक आधा मुल्य घटाएर विक्रिका लागि आह्वान गरेको छ ।
४५ दिने उन्नत जातको बंगुरको पाठा ३ हजारमा विक्री गर्दै आएको अनुसन्धान केन्द्रले अहिले १५ सय मुल्य राखेको छ । तर पनि भने जस्तो विक्री नभएको क्षेत्रिय अनुसन्धान केन्द्रका प्रमुख डा हरिकृष्ण श्रेष्ठको भनाई छ ।
क्षेत्रिय कृषि अनुसन्धान केन्द्रमा चालु आर्थिक बर्षको ६ महिनामा अहिलेसम्म ४८ वटा मात्र बंगुरका पाठापाठी विक्री भएका छन् । अघिल्लो बर्ष यहि समयमा १ सय ३३ वट विक्री भएका थिए ।
केन्द्रमा कृतिम गर्भाधानबाट निकालिएका हेमसायर, बर्कसायर र लार्जब्लाक जातका र नागपुरी, कालो पाख्रिबास ,हर्रा स्थानीय जातका ३ सय बंगुरका पाठापाठी रहेको केन्द्रले जानकारी दिएको छ ।
